Ramazan qeydləri

Daha bir Ramazanın son günlərini yaşayırıq. Bitməsinə nə qədər üzülsəm də kiçik zaman ərzində həyatıma böyük toxunuşlar etdiyi üçün sevinirəm. Son zamanlar təslimiyyət mövzusu məni tez-tez düşündürürdü. Etirazsız təslim oluruqsa bəs niyə bizə iradə, qərar vermə gücü verilib və s. suallarıma cavab tapa bilmirdim. Cavab tapdığımı deyə bilmərəm, amma Ramazan ayı araşdırma, öyrənmə və yeni fərqindəliklər üçün vəsilə oldu. Bəlkə də həyatımın ən bərəkətli Ramazanını yaşadım.

Peyğəmbərimizin həyatı barədə o qədər dəyərli məlumatlar öyrəndim ki. Onun əxlaqı, yaşadığı çətinliklər, müsibətlər qarşısında yenilməməsi, Allaha tam təslimiyyəti öz imanımı sorğulatdı. Hələ doğulmamışdan əvvəl atasını, 6 yaşında anasını, 8 yaşında himayəsində yaşadığı babasını itirən Məhəmməd peyğəmbər ağır sınaqlardan keçərək o ali vəzifə üçün yetişirdi. Peyğəmbərlik dövründə onu qoruyan əmisini, çox sevdiyi həyat yoldaşı Həzrəti Xədicəni, üç azyaşlı oğlunu, iki qızını itirir.  Allah rəsulunun yaşadığı kədəri təsəvvür edə bilirsiniz? İnsanların ən çox müsibətə uğrayanları əvvəla peyğəmbərlərdir, deyirlər. Həqiqətən elədir. Başına gələn bütün müsibətlərin, yaşadığı itkilərin bir səbəbi vardı: Allaha yaxınlaşmaq, Ona sığınmaq, təslim olmaq.

Bu çətin yolda onun iki əsas dəstəkçisi var idi: Həzrəti Xədicə və Həzrəti Əbu-Bəkr. Həzrəti Xədicə ilə evlilik və Əbu- Bəkr ilə dostluq onun həyatının əsas sütunları oldu. Yol nə qədər çətin olsa da, vəzifəsi nə qədər ağır olsa da, Allah ona onlar kimi yol yoldaşı vermişdi. Şübhə etmədən, sorğulamadan ona inanmaları, bütün var-dövlətini İslam uğruna xərcləmələri, qəbul edilməsi məntiqlə çətin, hətta ağlasığmaz olan şeyləri iman gücü ilə qəbul etmələri və peyğəmbərimizə həqiqi bir dost, yol yoldaşı olmaları o qədər gözəldir ki.

Taif kimi çətin səfərdən sonra Miracın baş verməsi mənə ən sevdiyim surələrdən olan İnşirah surəsini xatırlatdı. Həqiqətən peyğəmbərin və səhabələrin yaşadığı çətinlikləri bu gün bir müsəlman olaraq bizim yaşadığımız çətinliklərlə  müqayisə oluna bilərmi? Ümumiyyətlə buna haqqımız varmı? Onun əxlaqı ilə yaşayan və yaşadan müsəlman ola bilmişikmi? Bu sualın cavabını məncə hər kəs siyərdə axtarmalıdır. Çünki  siyərdə özünü axtaran mütləq bir yol tapar... 

Bu ilki Ramazanımı gözəlləşdirən siyər kitabından əlavə baxdığım, dinlədiyim və oxuduqlarımdan bəyəndiyim bir neçə cümləni paylaşıram:

Mən Xədicənin sevgisi ilə ruziləndirildim.

Sevmək ağıl, məntiq işi deyil, qəlb, təslimiyyət işidir.

Dağa baxarkən dağı görürsənsə demək ki, sən sən olmamısan. Dağın sahibini gör.

Bir yola çıxarkən iki insana ehtiyacımız var: doğru həyat yoldaşı və doğru dost.

Faydalı linklər:

Siyər seriyası

Gönül sadası

40 öncü