İkiqai

İkiqai yapon dilində (iki-həyat, qai-məna, səbəb) yaşam səbəbi deməkdir. Başqa sözlə ikiqai səhərlər səni yatağından qaldıran səbəb, əsrlərdir soruşulan “mən kiməm, niyə buradayam, həyat məqsədim nədir” suallarına yaponsayağı cavabdır.

İkiqai 4 dairənin kəsişməsidir:

Nəyi sevirsən? – Bu, ehtirasındır. (Passion)

Nəyi yaxşı bacarırsan? – Bu, sənətindir. (Profession)

Dünyanın nəyə ehtiyacı var? - Bu, missiyandır. (Mission)

Sənə nə üçün pul verirlər? – Bu, işindir. (Vocation)

Bu 4 dairənin düz mərkəzi ikiqaidir.

İkiqainin 5 önəmli sütunu var. Bunlar kiçik addımla başlamaq, özünü sərbəst buraxmaq, harmoniya və davamlılıq, kiçik şeylərlə xoşbəxt olmaq, indiki anı yaşamaq.

Qulağa xoş gəlsə də, əməl edilməsi çətindir. Buna görə də ikiqaini tapmaq asan deyil.

Bəs ikiqaini necə tapaq? Məncə bu sualın ən tutarlı cavabı budur: “özümüzü tanıyaraq”.

Mənə gəlincə ikiqaimi tapdığımı düşünürəm. Ən azından hələlik.

İkiqaim ömür boyu öyrənməkdir. Oxumaq, yazmaq, qeydlər götürmək, öyrəndiklərimi paylaşmaq, kömək üçün müraciət edilmək və faydalı ola bilmək və özümlə vaxt keçirmək məni xoşbəxt edir. Məncə dünyanın elə buna ehtiyacı var. Öyrəndikcə heç nə bilmədiyimi anlamaq və daha çox öyrənməyə çalışmaq məni xoşbəxt edir. Oxumaq istədiyim sonsuz sayda kitabın olması məni xoşbəxt edir. Yazmaq, hiss etdiklərimi kağıza tökmək məni xoşbəxt edir. Kitablarda altından xətt çəkdiyim hər bir cümlə, işarələdiyim hər bir səhifə, yazdığım hər bir sətir məni xoşbəxt edir. Rəngli qeydlərlə doldurduğum dəftərlərim məni xoşbəxt edir. Etmək istədiklərimin çoxluğu məni xoşbəxt edir.

Və mən anlamıram. Dünyada bu qədər öyrəniləsi, zövq alınası şeylər varkən, niyə bəzi insanlar öz həyat məqsədini, yaşam səbəbini tapmır?

Siz də o insanlardansınızsa linkə daxil olaraq qısa testdən keçə və ikiqainizin olub-olmadığını yoxlaya bilərsiniz:

https://ikigaitribe.com/ikigai/the-ikigai-questionnaire/

İkiqainizi tapmağınız diləyilə...