Özümə hesabat

2023-cü ili bir sözlə ifadə etməli olsam bu söz "ötə" (beyond) olar. Bu il sərhədlərdən, arzulardan, çərçivələrdən ötə nə olduğunu öyrəndim. Zehnimi kilidləyənin əslində özüm olduğunu, istədiyim anda bu kilidi söküb atmağın öz əlimdə olduğunu öyrəndim.

Bu il iki ən böyük arzum gerçəkləşdi. Xəyallarımın ölkəsi İtaliyanı gördüm, “Bella ciao”  oynayarkən ilin ən xoşbəxt anlarını yaşadım. “Ye, dua et, sev” romanındakı kimi italyan mətbəxini ruhumda hiss etdim. (P.S. Qaldı Hindistanda dua etmək və İndoneziyada (Bali) sevmək)

Və  11 il sonra (nəhayət ki!) psixologiya oxumağa başladım. Hər kəs doktorantura təhsili almağımı gözləyərkən mən yenidən  başa qayıtdım. “İşin-gücün qurtarıb, hələ 4 il oxuyacaqsan?”, “sən psixoloq olanda gör neçə yaşın olacaq”, “gül kimi ixtisası qoyub adam yenidən oxuyar?” deyənlər oldu, “səndən psixoloq olmaz deyənlər” oldu, amma vecimə oldumu? Əlbəttə ki, xeyr! 11 ilin söndürə bilmədiyi psixologiya eşqini belə ucuz cümlələrlə öldürə biləcəklərini düşündülər.

Bu il əldə etdiyim ən böyük təcrübə sərhədlərimi zorlamaq oldu. 24 saat mənə yetmədi, sosial şəbəkələrdən uzaqlaşdım, yenə yetmədi, ən sevdiyim məşğuliyyət olan kitab oxumağı azaltdım, yenə yetmədi, yuxumdan kəsdim, yenə yetmədi, amma artıq kəsməyə bir şey qalmadı. Eyni anda 4 işi görməyin (görməyə çalışmağın)  verdiyi gərginlik və stress altında əzildim, bu işlərin hərəsi məni bir tərəfə dartdı. Yazıq Freyd kimi didik-didik edildim. Amma vaz keçmədim. İli sağ-salamat başa vurdum çox şükür.

Bu il ilk dəfə “xoşbəxtlik qutusu”-nu tətbiq etdim. İl ərzində “mən burada xoşbəxt idim” dediyim anları kiçik kağızlara qeyd edərək bir qutuya yığdım. Və il sonunda əslində nə qədər xoşbəxt olduğumu anladım, hər zaman etdiyim şükür və minnətdarlığın haqqını verdim.

Bu il ərzindəki inkişafımı belə qruplaşdırdım:

1.       Akademik inkişaf

ü  50 kitab

ü  1 kitab tərcüməsi

ü  1 məqalə (konfrans üçün)

ü  1 seminar (emosional intellekt)

ü  26 bloq yazısı

ü  3 Medium yazısı

ü  5 hekayə

2.      Şəxsi inkişaf

ü  1 təlim (Toğrul Ələkbər)

ü  Sənət terapiyası fənni (Sevimli Dr.El)

ü  1 Mentorluq proqramı

ü  1 Udemy kursu

3.      Mental sağlamlıq

ü  Gündəlik tutmaq

ü  Sosial şəbəkə detoksu

ü  Xoşbəxtlik qutusu

 

2024 üçün not:

“Əziz özüm, 

Hüzurunu heç nəyə dəyişmə. Öz hekayənə fokuslan...”