Mənim "14 fevral"ım

Bu gün 14 fevraldır. Bu tarix sizə ilk olaraq Valentin gününü xatırlatdısa, təəssüf hissi ilə bildirirəm ki, bizdən deyilsiz. Valentin günü haqqında isə onu deyə bilərəm ki, sevginin günü olmur. Əgər deyirsizsə ki, yox, mütləq günü olmalıdır, onda məncə hər kəsin öz gününü - sevgi gününü elan edib onu qeyd etməsi daha məntiqlidir.

Başınızı çox ağrıtmadan, gələk mənim 14 fevralıma. Yəni kitabqurdlarının Valentin gününə.

Bu gün “Beynəlxalq kitab bağışlama günü”dür. İlk bədii kitabımı 3-cü sinifdə qardaşımın məsləhətilə oxumuşam. Mark Tvenin “Tom Soyerin macəraları” əsəri. Ardınca Haklberri Finin sərgüzəştləri, Azərbaycan Xalq nağılları, Koroğlu dastanı və s.

Heç düşünmədən deyə bilərəm ki, qazandığım ən mükəmməl vərdişlər arasında mütaliə birinci yerdədir. (Digər vərdişlər üçün növbəti postu gözləyin) Həyat qurtaran vərdiş də adlandıra bilərəm. Necə?

Tədqiqatlar göstərir ki, kitab oxumaq stressi azaldır, mental sağlamlığı qoruyur, beyni inkişaf etdirir.  Həm də əməlli-başlı. Tədqiqatlara inanmırsızsa heç olmasa mənə inanın. 3-cü sinifdən bəri oxuyuram və heç bir ziyanını görməmişəm. Sizə də məsləhət görürəm.

Mütaliənin həyat qurtarmasına inanmırsızsa, burada dayanın. İnanırsızsa ardını oxuyun.

Gəlin biraz kitabqurdu olmağın üstünlükləri və mənfi cəhətlərindən danışaq.

Əvvəlcə müsbətlər:

1.      Oxumaq mental sağlamlığı qorumağın ən yaxşı üsullarından biridir. Özünüzü pis hiss edəndə əlinizi kitaba atın. Oxuyun və neqativin necə bədəninizi və beyninizi tərk etdiyini hiss edin.

2.       Oxumaq bir növ “real dünyadan qaçış”dır. O real dünya ki, hamımız şikayətlənir, xoşbəxt olmadığımızı düşünürük. Siz də belə düşünürsüzsə, sizin kimi düşünən milyonlarla yazıçının dünyasına dalın. Tək olmadığınızı görəcəksiz.

3.      Oxumaq empatiya hissini artırır. O qədər insanla, o qədər tale ilə tanış olursuz ki, özünüzdən asılı olmadan hər kəsin dünyasına daxil ola bilirsiz.

4.      Oxumaq beyini məşq etdirir, yaddaşı yaxşılaşdırır, söz bazasını artırır, hazırcavab edir.

5.      Oxumaq yuxusuzluğun dərmanıdır. Yuxunuz gəlmirsə fəlsəfə kitabını götürün, vərəqləyin. On dəqiqə sonra yuxuya getməsəniz, adımı dəyişərəm.

6.      Oxumaq yeni insanlarla tanış olmaq deməkdir. Yerindən tərpənmədən səyahət etmək, öyrənmək, sevmək deməkdir.

7.      Oxumaq bitdiyi üçün təəssüflənmək, oxuduğun üçün xoşbəxt olmaqdır.

8.      Oxumaq kitab səhifələrində yaşayan xəyali qəhrəmanlarla ünsiyyət qurmaq, real həyatda zəhlən gedən insanlardan qaçıb o xəyali insanlarla sığınmaqdır. Bəli, oxumaq dəlilikdir.

9.      Oxumaq kitab qoxusu ilə nəfəs almaq, kitab alarkən uşaq kimi sevinmək, kitabxananın böyüdüyünü gördükcə sevgililəri görüşdürən Valentin kimi sevinməkdir.

10.  Ən əsası isə oxumaq xoşbəxtlikdir, zövqdür, axtardığın daxili rahatlıqdır.

Mənfi cəhətləri:

1.      Çox oxuyanda dəli, asosial insan kimi qəbul olunma riski var. Haqqınızda o ancaq oxuyur, adamayovuşmazdır kimi cümlələr deyilir. Təbii ki, buna fikir vermək lazım deyil.

2.      Bütün pulu kitaba verdiyiniz üçün cibinizdə siçanlar oynayır. Bu da düzələn işdir. Növbəti ay yenə maaş alacaqsız.

3.      Ömrünüz kitab sərgilərində, kitabxanalarda keçir. Olsun, instagramda, tiktokda vaxt keçirməkdən yaxşıdır.

4.      Gözləriniz zəifləyir. Bəs həkimlər niyə var?

Amma bütün bunlara baxmayaraq, mütaliə bir dəyərdir. Təsəvvür edin, şəhərdən, insanlardan uzaq, təbiətin qoynunda kiçik bir kənddə eviniz var. İçində də nəhəng kitabxananız. Ürəyiniz istəyən kitabı götürüb oxuya bilərsiniz. Bundan böyük xoşbəxtlik varmı? Kitabqurdu olaraq mənim üçün yoxdur.

Bir dəqiqə, əslində var. Bundan daha böyük xoşbəxtlik həmin kitabxanada oturub yaza bilməkdir. Axı oxumaq kimi yazmaq da bir ehtiyacdır.

Bir də o kitabxananı paylaşacaq başqa bir kitabqurdu da olsa, onda ikiqat “14 fevral” olar.

Mənə fikir verməyin, yenə xəyal dünyasına getdim.

Bayramınız mübarək!

Valentin gününü unutdurub yerinə Kitab bağışlama gününü sizə sevdirəcək bir kitabqurdu tapmağınız diləyi ilə...