V- Vendetta deməkdir (V for Vendetta)

Sizcə bir adam təkbaşına bir ölkənin taleyini dəyişə bilərmi? -Bilər.

2006-cı ildə nümayişə çıxarılan film ABŞ, İngiltərə və Almaniyanın birgə istehsalıdır. Antiutopiya, psixoloji dram janrındadır.

Film uzun illər sonra ortaya çıxan maskalı bir adamın qisasından bəhs edir. Baş rollarda Natali Portman və Hüqo Uivinq rol almışdır. Qay Foks (Qay Foks kimdir) maskası taxmış adam özünü Vendetta, qısaca V adlandırır. Vendetta italyan dilindən tərcümədə “qisas” deməkdir.

Filmdə hadisələr yaxın gələcəkdə baş verir. Amerika artıq hegemonluğunu itirib, sürətlə yayılan virus səbəbindən karantin elan olunub. Bu vaxt V peyda olur və işinə başlayır. Saat gecəyarısını göstərib tarix 5 noyabra keçəndə Çaykovskinin “1812-ci il” uverturasının müşayiəti ilə atəşfəşanlıq və partlayış baş verir. 5 noyabr həm də 1605-ci ildə İngiltərədə “Barıt sui qəsdi” tarixi hadisəsinin baş verdiyi gündür.

Yavaş-yavaş insanların gözünü açmağa başlayan V sonda bütün xalqı ayağa qaldırıb küçələrə tökməyi, ədalətsiz hakimiyyəti devirməyi bacarsa da, özünü xilas edə bilmir. Günahsızların xilası üçün özünü qurban verir. “İllərdir bu günü gözləmişəm, ölürəm, amma xoşbəxtəm” deyərək aşiq olduğu İvinin qucağında can verir.

Filmin məğzini ilk dəfədən anlamaq asan deyil. Antiutopiya, tarix, siyasət, fəlsəfə və dram birləşərək izləyicini əməlli başlı tərlədir.

Amma diqqətlə baxsaq diktatura, Hitlerin faşizminin əlamətlərini görə bilərik.

Filmdə çoxlu simvollar var.

Qay Foks maskası: parlament binasını partlatmağa nail olmayan Qay Foks və onun maskası mübarizə simvoludur.

V simvolu: Anarxiya simvolunu başı aşağı fikirləşin. Yəni anarxiyanın məhvi.

Müxtəlif bədən üzvləri (baş, göz, burun və s) simvolu: baş-baş ofisi, göz- nəzarət, barmaq- hüquq orqanını bildirir.

Valerinin məktubu, qızılgül, Ədalət xanım və  s çoxsaylı simvollar da vardır.

Qeyd edim ki, film Alan Murun eyniadlı romanı əsasında çəkilmişdir.

Filmdən sitatlar:

ü  Tanrı yağışdadır.

ü  Sən icazə vermədikcə keçmiş səni incidə bilməz.

ü  Xoşbəxtlik ən məkrli həbsxanadır.

ü  Qəfəsini yox, qəzəbini sev.

Ədalətin bərqərar olduğu dünyada yaşamaq diləyiylə...