Sehrli Saat

 Hələ qaranlıqdır, hamı yuxudadır. Birazdan günəş doğacaq. Bəlkə özünə bir yaxşılıq edəsən? Kameranı götürüb dan yerinin sökülməsinə tamaşa etməyə gedəsən? Təbiətin sehrli saatını yuxuda keçirməyi üstün tutursansa elə burada sağollaşsaq yaxşıdır. Yuxulu gözlərlə yerindən durub hazırlaşmağa başlamağı seçdinsə bundan sonrası sənlikdir.

Hər kəsin yatdığı bir vaxtda evdən çıxıb günəşi daha yaxşı görəcəyin bir yerə gedirsən. Dəniz ən yaxşı seçimdir. Çünki səni burda təkcə günəş yox, dəniz də, səma da gözləyir.

İnsanlarsız, səs-küysüz, təbiətlə baş-başa. Artıq rahatladığını hiss edirsən? İndi isti yatağından durduğuna görə əvvəlki qədər peşman deyilsən.

Yerini rahatlayıb günəşi gözləməyə başlayırsan. Artıq qaranlıq yavaş-yavaş sökülür, dan yeri qızarmağa başlayır. Bir tərəfdən də dənizin səsi, səmanın təmizliyi əhval-ruhiyyəni qaldırır.

Günəş yatağından qalxıb oyanana kimi rəngdən rəngə keçir. Təəccüblənirsən, axı niyə bu rəngləri mən daha əvvəllər görməmişəm.

Günəşin doğmasını seyr edərkən vaxt elə tez keçir ki, bir də görürsən günəş artıq səmanın düz ortasındadır, hələ ilıq olan şüaları ilə səni oxşayır.

Bu mənzərəni bir kliklə əbədiləşdirirsən.

Artıq təmiz beyin, məmnunluqla dolu qəlbinlə işə getməyə ya da evə qayıtmağa hazırsan.

İşdən çıxandan sonra evə qaçıb naharla əlləşmək yerinə günəşlə sağollaşmağa da gedə bilərsən.

Qürubun öz rəngləri var. Və sənə bəxş etdiyi duyğular da fərqlidir. Gün doğumu müsbət enerji verirsə,  gün batımı ruhi sakitlik, dinclik verir. Sanki sevdiyin adamdan “gecən xeyrə qalsın” mesajı almısan.

Aşağıda sənə gün doğumu və batımını seyr etməyin üçün 10 səbəb verəcəm:

1.      Gün ərzində yaxşı əhval-ruhiyyədə olacaqsan.

2.      Əvvəllər görmədiyin rəngləri görəcəksən.

3.      Təbiətə daha çox minnətdar olacaqsan.

4.      Gün doğumu ümid, gün batımı sakitlik gətirəcək.

5.      Hər bir gün doğumu və batımı fərqlidir.

6.      Görmək istəsən də, istəməsən də hər gün sənə yeni şans verilir.

7.      Bu, sənin kiçicik cənnətin olacaq.

8.      Səhər tez durmaq çətindirsə, olsun, qürubu seyr et.

9.      Səhər adamısansa günəşi bir neçə dəqiqə seyr et, baş verəcəklərə təəccüblənəcəksən.

10.  Və bütün bunlar pulsuzdur.

Yuxarıdakı 10 səbəbdən ən azı biri səni cəlb edirsə, növbəti sehrli saatda səni də gözləyəcəm.

Bir gün arzularına gün doğması diləyi ilə...