Ömür bitər, qeybət bitməz))

Kənd qadınlarının dünyada baş verən bütün yeniliklər haqqında müzakirə apardığı yer ya məhlə içi ya da doqqaz qabağıdır. Təsəvvür edin ki , evdən 5 dəqiqəlik qonşuya un, çay, soğan borcunu qaytarmağa gedən qadın saatlarla ilişib qalır. Səbəb əlbəttə ki qeybətdir. Dünən gecə qonşunun evində baş verən ən gizli söz-söhbətdən işıq sürətilə xəbər tutan və bu xəbəri birinci  qeybətsevərlərə çatdırmaq  üçün min cür bəhanə ilə evdən çıxan qadını nə evə qayıdanda əri tərəfindən amansızlıqla döyülmək qorxusu , nə qaynananın tənqidi, nə də evdə qalmış həyasız baldızın davası çəkindirə bilər.

Bəli , qeybəti sevmirəm, qeybət etmək günahdır deyən qadına inanırsızsa təbrik edirəm, dünyadakı ən saf adam sizsiniz.

Evdə çay süfrəsi ilə başlayan qeybət mərasimi əvvəl koridora, sonra eyvana, qapının ağzına , həyətə, və nəhayət doqqazın qabağına çatır. Bundan sonra qadınlar çətin də olsa şirin qeybətlərinə son verirlər. Hələ bulaqda baş verən qeybətləri demirəm. Çiynində 15 kiloluq səhənglə qadın elə gözəl qeybət edir ki, elə bil qu tükündən pərqu balışda yanında ləbləbi yeyərək uzanıb. Toyda baş verən qeybətdən saatlarla danışsan qurtarmaz. Necə deyərlər ömür bitər, qeybət bitməz.